हे दिवस गुलाबी थंडीचे
मृदू नि मुलायम बंडीचे
पेटवू शेकोटी, शेकू हात
चला करू आनंदाची बात... ||१||
फुला-फळांना बर्फाची शाल
सफरचंदाचे लाल गाल
रात्र फार, दिन झाले कमी
ही तर आहे थंडीची हमी... ||२||
तीळगुळाचा आला हा सण
पतंग उडवू, भरू मन
हुडहुडीने अंगी रे काटा
या धुक्यात हरवल्या वाटा... ||३||
आसमंती पसरले धुके
थंडीपुढे शब्द झाले फिके
उबेच्या मिठी प्रेमीयुगुल
एकमेकांत झाले मश्गूल... ||४||
गुलाबी थंडीत, हातात हात
होऊ द्या प्रेमाची बरसात
पांघरू स्वेटर आणि शाल
थंडीत जीवाचे असे हाल... ||५||
जानेवारीत थंडीचा ताफा
थंडीत तोंडी येती रे वाफा
चला ओढू थंडीची चादर
येता थंडी असावे सादर... ||६||
No comments:
Post a Comment