आठवण तुझी येता
रूप माझे खुलते
आठवणींच्या हिंदोळ्यावर
मन बावरे झुलते..... {१}
चंद्र-चांदणीच्या साक्षीने
ढगांवर सजवला प्रेमझुला
दिलेले वचन निभव रे
माझ्या प्रीतीच्या फुला..... {२}
क्षण आपले सोबतीचे
मला रोज आठवतात
तू नसतोस जवळी तेव्हा
पाणी डोळ्यांत साठवतात..... {३}
बाहूंची ती घट्ट मिठी
हलकासा स्पर्श अलवार
चांदण्यारातीत राजसा तू
जवळ घ्यायचास हळूवार..... {४}
हलके - हलके बुडायचो
आपण प्रणयाच्या डोहात
तुझे राजबिंडे, मोहक रूप
मला सदा पाडायचे मोहात..... {५}
छळते आजही मला
मंतरलेली ती रात्र
साजणाच्या सहवासाने
गंधाळलेली सारी गात्र..... {६}
अशीच राहावी तुझी साथ
राहू दे जन्मोजन्मीची प्रीत
एकांताच्या त्या धुंद क्षणी
तुझ्याचसाठी गाते प्रेमगीत..... {७}
No comments:
Post a Comment