इंद्रधनू ( कविता )

माझ्या दारात सजले
छान इंद्रधनूचे तोरण
चंद्र, सूर्य, तारे, वारे
यांना दिले आमंत्रण

तेजस्वी सूर्य तांबडा-लाल
आला उधळीत प्रकाश
दवबिंदू चमकती तृणावर
सुंदर निळे-निळे आकाश

रात्री आला चंद्र भाऊराया
चंद्रिकांनी सजले नभांगण
वाटते नटले आज येथे
ताऱ्यांनी जणू तारांगण

आले सात रंग उधळत
सुंदर सप्तरंगी इंद्रधनुष्य
रंगीबेरंगी किरणे आली
सुखाचे झाले आयुष्य

अशी इंद्रधनूची कमान
रंग उधळते सात
एकमेकांच्या साथीने
करूया संकटावर मात