माझ्या मराठी भाषेचा
आहे मला अभिमान
चला गाऊयात सारे
मराठीचे गुणगान... <१>
चौदाखडी पाटीवर
कौतुकाने लिहूयात
गोड आपल्या वाणीने
मराठीत बोलूयात... <२>
परकीय शब्दसुद्धा
उरी सामावून घेते
तिच्यातले प्रेम सारे
पूर्ण जगताला देते... <३>
वृत्ते, कविता, गझल
मराठीचे अलंकार
मात्रा, उकार, वेलांटी
हाच भाषेचा श्रृंगार... <४>
मराठीचा हा गोडवा
सदा अमर रहावा
गोड भाषेचा सन्मान
सर्व लोकांनी करावा... <५>
अशी मधाळ मराठी
शोभे कशी राजभाषा
सदा रहावी, टिकावी
एवढीच एक आशा... <६>
